घुस प्रकरणप्रति पत्रकार महासंघ दाङको ध्यानाकर्षण – छानविन समिति गठन

दाङ । राप्ती गाउँपालिकाको प्रगन्ना सिँचाई कुलो खन्ने बेलामा ढुंगाजन्यवस्तुको उत्खनन्का लागि पत्रकारदेखि प्रहरी प्रशासनले घुस लिएको घटना बाहिरिएपछि नेपाल पत्रकार महासंघ दाङले ध्यानाकर्षण जनाएको छ ।

महासंघका अध्यक्ष दुर्गालाल केसी र सचिव आर के शितलले एक विज्ञप्ती जारी गरी ढुंगाजन्य वस्तु उत्खनन्का लागि जिल्लाका प्रशासन तथा सुरक्षा प्रमुख, जनप्रतिनिधी, पत्रकार लगायतलाई रकम बाँडेको घटना सार्वजनिक भएकोप्रति गम्भिर ध्यानाकर्षण भएको उल्लेख छ ।

‘घटनाबारे आवश्यक अनुसन्धान गरि दोषीलाई कार्वाही गर्न सम्बन्धीत निकायसँग जोडदार माग गर्दछौ । कुनै पनि अवैध कामको ढाकछोप गर्ने वहानामा पत्रकारका नाममा कुनै पनि रकम दिने काम नगर्न र कसैले रकम मागेमा तत्काल नेपाल पत्रकार महासंघमा जानकारी गराउन सम्बन्धित सबैलाई आह्वान गर्दछौ ।’ विज्ञप्तीमा भनिएको छ ।

घटनाको छानबिनका लागि अध्यक्ष दुर्गालाल केसी संयोजक रहेको तीन सदस्यीय छानबिन समिति गठन गरिएको छ । समितिको सदस्यमा सन्तोष सुवेदी र उदय बिसी रहनुभएको छ । समितिले घटनाको सत्यतथ्या छानबिन गरी असार ३१ गतेभित्र प्रतिवेदन सार्वजनिक गर्ने विज्ञप्तीमा उल्लेख छ ।