दाङमा मायाजालमा पारी रकम असुल्न खाेज्ने तीन महिलालाई नगद सहित डेढ वर्ष कैद सजाय
नमुनापत्र संवाददाता
दाङ । दाङमा एक पुरुषलाई हनिट्रयाप अर्थात मायाजालमा पारी रकम असुल्न खोज्ने तीन महिलालाई अदालतले डेढ वर्ष कैद, नगद जरिवाना र क्षतिपुर्तिसहितको फैसला गरेको छ ।
एक जना पुरुषलाई प्रेमको प्रलोभनमा पारेर ५० लाख रुपैयाँ मागेर नदिएमा बलत्कार गरेको मुद्धा हाल्ने भनि धम्कि दिने घोराही उपमहानगरपालिका १५ निवासी ३५ वर्षीया सीतादेवी थापा, सोही ठाउँ निवासी ४६ वर्षीया खुमा वली र ३४ वर्षीया सुष्मा परियारलाई अदालतले दोषि ठहर गरेको हो ।
उनीहरु तीनै जनालाई जनही एक वर्ष छ महिना कैद, १५ हजार जरिवाना र १० हजार क्षतिपुर्ति दिने फैसला गरेको छ । पुरुषले अदालतमा २०७८ असोज १९ गते तीन जना महिलाविरुद्ध उजुरी दिएका थिए ।
उनीहरुलाई अपराधि लाभ शिर्षकमा मुद्धा चलाइएको थियो । दाङ देउखुरी जिल्ला अदालतका न्यायधिस जगत बहादुर पौडेलको इजलासले सोमबार तीन जना महिलालाई दोषि ठहर गरी कैद सजाय तोकेको अदालतका सुचना अधिकारी दामोदर घिमिरेले जानकारी दिनुभयो । सीतादेवी थापाले लगेको १ लाख समेत फिर्ता गर्नुपर्ने अदालतले फैसला गरेको सुचना अधिकारी घिमिरेले बताउनुभयो ।
फौजदारी अपराध संहिता २०७४ को दफा २५३ को उपदफा १ को खण्ड ख अनुसार यस्तो कसुर गर्नेलाई तीन वर्ष कैद र ३० हजार जरिवाना हुने व्यवस्था छ ।
